Argentin

Argentinan Tazovaldkund
República Argentina

Flag	Valdkundznam
Pälidn	Buenos Aires
Eläjiden lugu (2014)	43 024 374 ristitud
Pind	2 766 890 km²
Kel'	ispanijan
Valdkundan pämez'	Maurisio Makri
Päministr	Amado Budu
Religii	hristanuskond
Valüt	argentinan peso (ARS)
Internet-domen	.ar
Telefonkod	+54
Aigvö	UTC-3

Argentin (isp.: Argentina), täuz' oficialine nimituz — Argentinan Tazovaldkund (isp.: República Argentina), om valdkund Suviamerikas. Sen pälidn da kaikiš suremb lidn om Buenos Aires.

Istorii

Vl 1816 heinkun 9. päiväl Argentin tedoti ičeze ripmatomudes Ispanijaspäi.

Geografijan andmused

Argentinan topografine kart.

Argentin om mavaldkundröunoiš Čilinke päivlaskmas (röunan piduz — 6691 km), Bolivijanke (942 km) da Paragvainke (2531 km) pohjoižes, Brazilijanke (1263 km) da Urugvainke (541 km) pohjoižpäivnouzmas. Ühthine röunoiden piduz — 11,968 km. Valdkundan päivnouzmaižed randad lainištab Atlantine valdmeri. Randanpird — 4989 km.

Kaikiš korktemb čokkoim om Akonkagua-mägenoc, 6960 m valdmeren pindan päl.

Londuseližed pävarad oma kivivoi, metallad (raudkivend, vas'k, tin, hahktin, cink, uran), mahuz.

Tobmuden organad

Ohjandusen form om federativine prezidentine tazovaldkund. Valdkundan pämez' om prezident. Kaik rahvaz valičeb händast 4 vodeks.

Parlament om kaks'kodine Nacionaline Kongress.

Nügüdläine Argentinan prezident om Maurisio Makri; päministr om Amado Budu. Edeline prezident om Kristina Kiršner (10.12.2007-10.12.2015).

Administrativiž-territorialine jagand

   Kacu kirjutuz: Argentinan administrativiž-territorialine jagand.

Argentin alajagase 23 agjaha (provincijha) da 1 pälidnan avtonomižhe ümbrikho (Buenos Aires).

Eläjad

Argentinas elädas argentinalaižed.

Vl 2010 eläjiden lugu oli 40 091 359 ristitud.

Toižed sured lidnad (vl 2007, surembaspäi penembha): lidnad-millionerad oma Kordov, Rosario; enamba 500 tuh. ristitud — Mendos, San Migel' De Tukuman, La Plat, Mar Del' Plat.

Ekonomik

Vl 2012 Argentinan päeksport oli soi da soivoi (22%), avtod da toižed likkuimed (10%), kukuruz (6%); toine eksport — kivivoi (5%), fruktad, lehmänliha da nahkad.

Irdkosketused

• Argentinan Tazovaldkundan oficialine portal. (isp.)