Alituntunin ng Nilalaman

Kinakikitaan ng sinseridad ang mga pinakamagagandang reviews. Naglalahad ito ng mga makabuluhang kwento, kinapupulutan ng maraming detalye, at pinagmumulan ng isa o dalawang payo na talagang nakatutulong sa mga mamimili. Ito ang ilan pang mahahalagang bilin para makapagsulat ng magagandang reviews.

• Personal na karanasan: Gusto naming malaman ang tungkol sa personal na karanasan mo bilang mamimili, hindi ang tungkol sa nadinig mo sa katrabaho o asawa mo. Subukan mong ilahad ang iyong kwento nang hindi lang puro pangkalahatang paglalarawan at mga alegasyon.
• Ganap na Kawastuhan: Siguraduhin na tama ang review mo. 'Wag kang magalinlangan na ipahayag ang opinyon mo, pero 'wag kang mag-imbento lang ng istorya o magsulat ng di makatotohanang karanasan. Hindi kami kumakampi sa kahit sino pagdating sa mga alitan tungkol sa katotohanan, kaya inaasahan namin na maninindigan ka para sa review mo.
• Review updates: Dapat tungkol sa bagong karanasan o interaksyon sa negosyo ang mga review updates. 'Wag nang ulit-ulitin ang parehong istorya na nabanggit mo na noong nakaraan. Kung gusto mong magdagdag sa iyong karanasan noon, i-edit mo na lang ang review mo sa halip na gumawa ng bagong update.

Dapat direktang nauugnay sa negosyo at kumakatawan sa karaniwang karanasan ng mga kostumer ang mga larawan at video (halimbawa: ano'ng itsura ng negosyo, ano'ng mga inaalok ng negosyo, atbp.).

Kung nagdagdag ka ng larawan o video na nagpapakita ng kakaiba at personal na karanasan sa pagbisita sa isang negosyo (halimbawa: masayang grupo ninyong magkakaibigan habang nasa gimikan, langaw sa sopas mo), posibleng tanggalin namin 'to mula sa gallery ng larawan ng negosyo, pero makikita pa din 'to kasama ng review mo kung magsulat ka man nito para sa negosyong 'yon.

Nauunawaan namin na mahalaga ang makapagtanong at makakuha ng sagot tungkol sa mga negosyo mula mismo sa komunidad. Pero, gaya nga ng sabi ng iba, ang bawat karapatan ay may kaakibat na responsibilidad. Heto ang ilan sa mga paalalang kailangang isaalang-alang sa tuwing makikipag-ugnayan sa iba.

• Maging Matulungin: Maraming tao ang makakabasa ng mga tanong at sagot mo at makatutulong ito sa kanila kaya subukan mong magbigay ng malinaw na sagot. Ayus lang magpatawa, pero importanteng magbigay pa din ng makabuluhang imormasyon.
• 'Wag Magpaliguy-ligoy: Posibleng makatanggap ng madaming sagot ang mga tanong na sumasaklaw sa maraming paksa, pero hindi lahat ng ito'y makabuluhan. Kapag mas eksakto ang mga detalye sa tanong/sagot mo, mas marami kang makakalap na impormasyon. 'Wag ding magtanong ng mga bagay na wala namang kaugnayan. Mas mabuting i-post sa Talk ang ilang mga paksang gaya ng “ano bang masarap na kainan dito sa baranggay na 'to.”
• Maging Malinaw: Kung hindi malinaw ang tanong mo, baka hindi ka makatanggap ng sagot para dito. Siguraduhing detalyado ang tanong mo para makatanggap ka din ng makabuluhang sagot.
• Iwasan: Sumagot sa tanong sa pamamagitan ng isa pang tanong; tumataliwas ito sa unang katanungan at kadalasan at hindi naman nakakatulong.

'Wag kang mahiya — gamitin mo ang account profile mo para ipaalam sa mga tao kung sino ka at kung saan ka interesado. Gusto ng mga user na nagbabasa ng mga reviews mula sa mga taong kilala at pinagkakatiwalaan nila (at hindi iyong mga taong bakante ang profile o kaya'y puno ng malalaswang nilalaman).

Ang Talk ay lugar para sa masaya, bukas at matapat na usapan tungkol sa mga nagaganap sa iyong komunidad. Madaling sumali sa usapan at magdagdag ng post sa Talk, pero mag-ingat sa mga nilalagay na post dahil hindi na ito pwedeng burahin. Malaki ang maitutulong ng paghinto nang saglit para pag-isipan ang sasabihin mo. At dahil importante sa'min ang tiwala at ang pagiging matapat, mas mahigpit kami sa mga taong nanggugulo sa kapayapaan ng komunidad nang hindi nagpapakilala kaysa sa mga taong naninindigan ng kanilang opinyon.

May feature para sa pagpapadala ng mensahe ang Yelp na pwede mong gamitin para makipag-ugnayan sa mga kapwa mo yelper. Una sa lahat, huwag gamitin ang feature na ito para manggulo ng ibang user o magpadala ng mensaheng hindi angkop ang nilalaman. Pangalawa, tandaan na ang mga user account ay para sa personal na paggamit lang at hindi pang-komersyo. Dapat magpadala ng mensahe sa mga sumusulat ng review ang mga may-ari ng negosyo nang gamit ang kanilang libreng account. Para magawa ito, hinihiling namin na mag-upload sila ng malinaw na litrato nila para maging mas personal ang kanilang mensahe.

May nasagap ka ba'ng bonggang balita tungkol sa mga kaganapan sa barangay mo? Ayos! I-post mo 'to sa mga Kaganapan sa Yelp. Pakiusap, 'wag gamitin ang Kaganapan para sa mga promosyon o para magbebenta. Mas maganda rin kung laging bago ang mga post. Kaya pakiusap, 'wag magdagdag ng kaganapan nang anim na buwan bago ang tinakdang petsa.

Ang mga may-ari ng negosyo ay dapat kasali din. Ilang payong kaibigan:

• Mula sa Negosyo: Pwede mong gamitin ang tab na "Mula sa Negosyo" para magbahagi ng mahalagang impormasyon tungkol sa negosyo mo. Paalala lang, siguraduhing makabuluhan impormasyon lang ang ilalagay mo dito. 'Wag gamitin ang feature na ito bilang paraan ng pag-atake sa mga kakompetensya mo sa negosyo, panlaban sa mga nagsulat ng reviews, pagbatikos sa Yelp, pagdadagdag ng mga keywords, o pag-aanunsyo tungkol sa espesyal na alok o promosyon — tatanggalin din namin ang mga ito kapag nakita namin.
• Mga Pampublikong Komento: Ang direktang mensahe ang kadalasang mas epektibong paraan para resolbahin ang di pagkakaunawaan sa pagitan ng negosyo at ng di nasiyahang kostumer, pero pwede ding ayusin ng may-ari ng negosyo ang isyu sa pamamagitan ng pagpo-post ng pampublikong komento. Para sa direktang pagmemensahe, hinihiling namin sa mga may-ari ng negosyo na mag-upload ng kanilang totoo at malinaw na larawan para maging mas personal ang kanilang mensahe. Huwag gamitin ang pampublikong komento para magsimula ng pag-atake sa ibang tao, mag-advertise o mag-alok ng suhol para palitan ang review.
• Mga Video at Larawan: Ang mga video ay mabisang paraan para maipagkalat sa Yelp ng mga advertiser ang tungkol sa kanilang negosyo. 'Wag mahiyang ilabas ang pagkamalikhain mo, pero siguraduhing disente 'to. Hindi kami boto sa mga pagpapakita ng karahasan, paggamit ng droga, hubad, halos hubad, o iba pang bagay na may bahid ng kalaswaan. Bilang karagdagan, huwag ding gamitin ang video mo para siraan ang ibang negosyo at users sa Yelp; manghingi o mamilit ng iba para magsulat ng reviews; o sumagot sa mga reviews ng ibang user.
• Wag mong pilitin ang mga kostumer na magsulat ng reviews para sa negosyo mo at 'wag mo din silang suhulan para gawin ito.: Pakiusap, 'wag mong pilitin ang mga kostumer mo na magsulat ng review sa Yelp tungkol sa negosyo mo. Kapag namilit ka ng kostumer para magsulat ng review sa pahina ng negosyo mo, hindi magtatagal at mabibisto din ito — matalas ang pang-amoy ng mga mamimili. Alamin kung bakit hindi ka dapat nanghihingi ng reviews. Hindi ka rin dapat nanunuhol ng mga mamimili (kasama na dito ang pagbibigay ng diskwento at mga libreng produkto o serbisyo) bilang kapalit ng pagsusulat nila ng reviews.